تفتكروا ممكن,,,

أمنية حياتى قبل ما أموت ..حاجه واحده بس..نفسى أبقى تقيله شويه.. ههههههه..مش حاجه تضحك أنا بجد نفسى فى حاجه واحده عايزه أركز وأثبت شويه ..مشكلتى إنى بتعامل مع الناس دايما بطبيعتى ..اللى شويه مجنونه ..بس والله حاولت أتغير كتيييييير وأتعالج من ال ... هو إسمه إيه..مش عارفه أوصفه..(جنان شغال ..على شوية هبل وشوية سذاجه وطيبه..مش عارفه) المهم إنى بذلت مجهود وروحت لدكاترة وسألت ومش ناقص غير إنى أروح للشيخ سحتوت علشان يعملى عمل .. مش فاكره مين بالضبط كان قالى إن الناس مش بتحب الناس الخفيفه دى ..وإن كل ما الواحد كان وقور وغامض كل ما كان ده بيشد الناس أكتر.. وأنا عندى يقين إن المفروض الناس تحبك زى ما إنت من غير تمثيل ومن غير تكلف ..إنت مش مضطر تلبس قناع او جلد شخص تانى غيرك أو تصاب بإنفصام الشخصيه علشان الناس تقرب منك ..الحياه ابسط بكتير من كده ..ليه بنقعدها إحنا بحاجات تافهه زى دى..أنا مقتنعه بإن الناس لازم تحبنى زى ما أنا يحبوا طريقتى العفويه فى التعامل ..يحبوا التناقض اللى جوايا ..يحبوا جنانى ..ونشاطى وكسلى وإنفعالى ..يحبوا هزارى ويحبونى وأنا كئيبه..أنا مش المفروض أكون حد غيرى ..أنا مش داخله معركه حربيه... لازم تكون نفسك بمييزاتها وعيوبها واللى بيعرف حد ويحبه صديق ليه..بيقبله زى ما هو من غير مكياج... ولا إيه رأيكم؟؟